İranın Nəqliyyat və Şəhərsalma Nazirinin müavini və İran Hava Limanları və Hava Naviqasiyası Şirkətinin baş direktoru yerli mütəxəssislər tərəfindən tamamilə İran istehsalı olan ilk hava limanı radarının hazırlandığını bildirib. O, qeyd edib ki, bu böyük layihə Hava Elektronika Mütəxəssisləri (ATSEP) və İsfahan Sənaye Universitetinin mütəxəssisləri tərəfindən tamamlanıb.
Nəqliyyat və Şəhərsalma Nazirliyinin məlumatına görə, Mayın 24-də Xürrəmşəhrin azad olunmasının ildönümü münasibətilə mərasim keçirilib.
Məhəmməd Əmirani Ayətullah Cəmi Abadan Hava Limanında video-konfrans vasitəsilə keçirilən açılış mərasimində Xürrəmşəhrin böyük zəfərinin 43-cü ildönümü xatirəsini əziz tutaraq bildirib: Bu qürurverici gündə 6.9 milyon avro dəyərində 10 hava limanı və aviasiya layihəsi istifadəyə verilib.
O, qeyd edib ki, bu gün Buşehr, İmam Xomeyni, Şəhərud, İlam, Şiraz, Cirəft, Yasuc hava limanlarında layihələrin açılışı baş tutub və ən önəmli layihə olaraq İran Hava Limanları və Hava Naviqasiyası Şirkətinin ilk yerli MSSR MODE S radarının layihələndirilməsi, istehsalı, quraşdırılması və istifadəyə verilməsi mərasimi Ayətullah Cəmi Abadan hava limanında reallaşıb.
İran Hava Limanları və Hava Naviqasiyası Şirkətinin baş direktoru, Abadan hava limanı radarının istifadəyə verilməsinin əhəmiyyətindən danışaraq bildirib: “Ölkənin mövcud köhnə və istismara yararsız radar sistemlərini yeniləmək, eləcə də cənub-qərb bölgəsində radar əhatəsini genişləndirmək və gücləndirmək məqsədilə, bu radar sistemi Ayətullah Cəmi Abadan Hava Limanında istifadəyə veriləcək.”
Əmirani əlavə olaraq deyib: “Düşmənin zalım sanksiyalarına baxmayaraq, bu böyük layihə üçün ölkəmizin mütəxəssislərinə və övladlarına güvəndik. 2019-cu ildən etibarən İran Hava Limanları və Hava Naviqasiyası Şirkətinin aviasiya elektronika mütəxəssisləri və İsfahan Sənaye Universitetinin informasiya və kommunikasiya texnologiyaları tədqiqat institutu ilə birlikdə bu radarın tədqiqatı, layihələndirilməsi və istehsalına başladıq.”
O, qeyd edib ki, 2023-cü ildən etibarən bu radarın infrastruktur işləri, antenna və MSSR MODE S radar sisteminin quraşdırılması işləri başlayıb və 2024-cü ilin İyul-Avqust aylarından etibarən texniki və əməliyyat testlərinə start verilib. Hazırda isə Xürrəmşəhrin azad olunması günü münasibətilə prezidentin göstərişi ilə layihə istifadəyə verilməyə hazırdır.
Əmirani Abadan hava limanı üçün istehsal edilən MSSR MODE S radarının üstünlüklərinə toxunaraq deyib: “Bu radarın ölkə daxilində istehsalı ilə Ahvaz radar sisteminə dəstək, ölkənin cənub-qərbində radar əhatəsinin artırılması və daxili və tranzit uçuşların təhlükəsizliyinin yüksəldilməsi mümkün olacaq. MODE S texnologiyası daha dəqiq və geniş məlumatlar təqdim etməklə, hava hərəkəti nəzarətçilərinin işini asanlaşdırır. Bu layihə ilə təxminən 800 min avro xarici valyuta qənaəti də əldə olunmuşdur.”
İranın Nəqliyyat və Şəhərsalma Nazirinin müavini və İran Hava Limanları və Hava Naviqasiyası Şirkətinin baş direktoru sonda bildirib: “Əgər bu radar üçün düzgün bazar strategiyası həyata keçirilsə, onun xarici ölkələrə satışı və satış sonrası xidmət imkanları da mövcud olacaq.”